જગમાલ દાજી ગયો

જગમાલ દાજી ગયો

નવરાત્રીમાં ગરબાના તાલે રમવામાં અમારી ટીખળ ટોળી બહુ આગળ નહિ. તો બિલકુલ પાછળ પણ નહિ. આગળ લખતા પહેલા એક નિખાલસ કબૂલાત કરી દવ છું. અમે લોકો ગરબા રમવાં કરતા જોવામાં વધુ પારંગત હતા. ટીનો, દિલો, દલો અને જીલો આ ચાર તો (અને થોડો ઘણો હું પણ) એવા ગરબા રમે કે એ લોકો એક બે રાઉન્ડ જો પુરા કરે તો એમના સિવાય કોઈ તમને રમતું ના દેખાય. તમે જેવું માન્યું છે એજ કારણ હતું. હા અશ્કો, નરીયો અને જગમાલ આ ત્રણે તો બે તાલી, ત્રણ તાલીથી લઈને જ્યાં સુધી ગણી શકાય એટલી તાળીઓના ગરબા એમને ફાવે. અને દોઢિયાંમાં તો એમની ગજબની માસ્ટરી !!
નવમા દિવસે નવરાત્રીની પુર્ણાહુતી થાય. નવ નવ દિવસ રોજ દિવસે ભણવાનું અને રાત્રે ગરબા ! રોમાંચ સાથે સાથે પગમાં માં પણ મોચ ! એ નવ રાત્રિનો થાક એટલો બધો ભેગો થઇ ગયો હોય પણ દશમાં દિવસે તો હોય દશેરા. અને દશેરાનું નામ પડતાંજ અમારા બધાંનો થાક પળમાં ગાયબ ! દશેરાના દિવસે શ્રીરામે રાવણ વધ કર્યો એની ખુશીમાં તો વડીલ લોકોના થાક ઓગળી જતા. પણ અમારા થાક બે વસ્તુને લીધે ઓગળી જતા. એક તો દરેકને ઘરે તે દિવસે, ફાફડા જલેબી,સાટા, ચોરાફળી અને ઘારી ખવાય. મિત્રો, દશેરાના દિવસે જેટલા ફાફડા ટેસ્ટી લાગે એટલા એક પણ દિવસ નહોતા લાગતા. એક વાર તો કારણ જાણવા માટે કોઈકે ફાફડાને ફોરેન્સિક લેબમાં પણ મોકલી જોયેલા. તો ફોરેન્સિક વાળાએ એવું કહેવાડયું કે આટલા સેમ્પલમાં કઈ ખબર ના પડે. ત્યારથી અમારા મહેલ્લાના લોકો ફાફડા જલેબીનું સેમ્પલ કોઈને નથી આપતા. પછીથી તો યુનો વાળાએ પણ અમારા મહેલ્લાને ટેકો જાહેર કરેલો.
ફાફડા જલેબી અને બીજી મીઠાઈ ખાઈને અમે લોકો બહાર આવી જતા. કોઈક તો હાથમાં જ ફાફડાને કેન્ડી જેમ પકડીને ખાતું ખાતું આવે. જોકે મિત્રો તમને એવું લાગતું હશે કે અમે લોકો બહુ અધીરા, તો વાત સાચી છે અમે લોકો બહુ અધીરા હતા. ઢોલનો અવાજ અમને ઘરમાં ચેન લેવા દે તો ને !
“હાલ હવે રાવણની સવારી છેક ચબૂતરે આવી ગઈ….” ઘરના દરવાજેથી જ હકાએ બૂમ પાડીને મને બોલાવી લીધો. ટ્રેક્ટરની ટ્રોલીમાં વચ્ચો વચ્ચ રાવણનું પૂતળું ઉભું હોય. બાજુમાં રામ અને લક્ષ્મણ બનેલા બે ભાઈઓ હાથમાં ધનુષ્ય લઇને ટ્રોલીમાં આમથી તમે ફરતા હોય. ટ્રોલીને અડીને ઉપર હનુમાનજી બનેલ ભાઈ કૂદાકૂદ કરતા હોય. ટ્રેક્ટરની આગળ ગામના સજ્જનો અને છોકરાઓ જતા હોય. સૌથી આગળ ઢોલી ઢોલ વગાડતો હોય. પાછળ નાના ભૂલકાઓ અને સ્ત્રીઓ જતી હોય. હવે આવી રોમાંચ ભરી વણજાર જતી હોય અને અમારા જેવાના દિલ બીજામાં લાગે ખરા ? (આ પ્રશ્ન નથી પૂછ્યો પણ લેખનો જ એક ભાગ છે) આ વણજાર ધીરે ધીરે તળાવની પાળે આવે. પછી રામ અને લક્ષ્મણ બેય થોડી બાણબાજી કરે. અને કોઈ વડીલ ઈશારો કરે એટલે રામ એક સળગતું બાણ રાવણના પૂતળા પર મારે.
રાવણના પૂતળામાં શું શું ભરેલું હોય છે ? એ વિષે લખવું થોડું વધુ પડી જશે. પણ મને યાદ છે ત્યાં સુધી એકદમ જીણું સૂકું ઘાસ ભરવાનું અમારા ગામ વાળાએ ચાલુ કરેલું એવું કોઈ સજ્જન કહેતું હતું.
ઢોલના આવાજ સાંભળીને મને હકો લઇ ગયો. તળાવની પાળ તો અમારે માટે અડ્ડો હતો. અમે જે જગ્યાએ મળતા ત્યાંથી થોડે જ દૂર રાવણને બાળતા. નીચે આખો માંચડો આવી ગયો હતો. હું અને હકો હજી તો થોડા આગળ ગયા કે ટોળી અમારી બેયની રાહ જ જોતી હતી. આજની અમારી ટોળીમાં એક પાત્ર આજે વધારાનું છે; અને એ છે જગમાલ.
જગમાલ વિષે એકદમ ટૂંકમાં જણાવી દઉં તો; એના પિતાજી અમારા મહેલ્લામાં ટેમ્પરરી રહેવા આવેલા. ટેમ્પરરી એટલા માટે કે, તેઓની ટ્રાન્સફર ફક્ત ત્રણ મહિના પૂરતી થયેલી. અને ત્રણ મહિના એ અમારા મહેલ્લામાં રોકાઈ ગયેલા તે એમનું સદભાગ્ય હતું. અને જગમાલ જેવો ટેમ્પરરી મિત્ર મળેલો એ અમારું સદભાગ્ય હતું.
નવા મિત્ર જગમાલ સાથે અમારી ટીખળ ટોળી એ મોટા ટોળામાં ભળી ગઈ. પીપુડાંનો અવાજ, ઢોલનો અવાજ, એટલા મોટા ટોળાનો અવાજ અને સાથે સાથે મોટા મોટા લાઉડસ્પીકરો પર ગવાતા ગીતોનો આવાજ. એક વસ્તુની મને નવાઈ લાગતી. હનુમાનજી બનેલ વ્યક્તિ કોઈના ઘર પરથી નળિયું લેતો અને માથે પછાડીને ફોડતો. એ દિવસે ઓછામાં ઓછા એ વીસેક નળિયા ફોડી નાખતો હશે. મને નવાઈ એ લાગતી કે કોઈ એને ના નહોતું પડતું, અને કોઈ એની પરવા પણ નહોતું કરતુ બોલો. એને માથામાં વાગી જશે કે કોઈના નળિયાની નુકશાની !
રામ અને લક્ષ્મણ હવે તો તીર લઈને સાબદા થઇ ગયા છે. એ બેઉ સાબદા થાય એટલે બધા લોકો એકદમ ઉત્તેજિત બનીને આંખોને ખૂંપાવી દેતા. સજ્જને રામને ઈશારો કર્યો કે હવે રાવણ વધ કરી નાખો, એનું અભિમાન ઓગળતું જાય તે પહેલા. કોઈ એકે બાણને સળગાવ્યું અને રામ તો આમથી તમે દોડે છે. “ લે લેતો જા ” એમ બોલીને બાણને રાવણના પૂતળા પર છોડ્યું. કેરોસીન વાળા ભાગ પર સૂકું ઘાસ અને બળતું બાણ ત્રિવેણી સંગમ થયો કે રાવણ તો ભડ ભડ બળવા લાગ્યો. રાવણનું બળવાનું ચાલુ થાય એટલે સ્વયં સેવકો બધાને દૂર ભગાડે, કેમ કે ફટાકડાથી કોઈ દાજી ના જાય.
બધાને ભગાડવા લાગ્યા ત્યારે અમને ખબર પડી કે જગમાલ તો આજે ટ્રેડિશનલ ડ્રેસમાં આવ્યો હતો. એ પણ ખબર ના પડેત, પણ જગમાલ ને દોડીને જવાનું અઘરું લાગતું હતું. ઉપર શર્ટ અને નીચે ટ્રેડિશનલ ધોતિયું; બરાબર જોયું તો એનો વટ પડતો હતો. આખી ટોળીમાં અલગ તરી આવતો હતો. છતાં ગમે તેમ કરીને અમે લોકો ઘણા બધા દૂર જતા રહ્યાં.
“બસ હવે બહુ દૂર નથી જવું” એમ બોલીને રઘલો ઉભો રહી ગયો.
“હમણાં એકાદો ટેટો આવી ગયો ને તો ખબર પડશે” જીલાએ એને લીધો
“કાંઈ નહિ નરીયા…બસ અહીંથી બરાબર દેખાય છે” ટીનાએ પણ સાથ પુરાવ્યો કે અમારી ટોળી રોકાઈ ગઈ.
“સાચી વાત છે છેલ્લા ઘણા વર્ષથી રોકેટ અને હવાઈનો ઉપયોગ નથી કરતા”
“હા એ તો છે જ ચાલો કોઈ વાંધો નહિ ” મેં પણ સાચી વાતમાં ટેકો પુરાવ્યો.
“અરે યાર રોકેટ નથી પણ સુતળી બૉમ્બ તો હશેજ ” જીલાએ બધાને ચેતવ્યા.
“તને બીક લગતી હોય તો જા છેક પાળ પર ચડી જા”  દિલો અકળાયો એટલે જીલો એની બાજુમાંથી જીગા બાજુ ઉભો રહી ગયો.
“જીલાની વાત સાચી છે, સુતળી બોમ્બનું એક છોતરું પણ આવે તો ય કાફી છે” અશ્કાએ કહ્યું.
“ઓ ફટ્ટુ….તું અને જિલિયો બેય મારી સામેથી હટો તો” ટીનાએ જોરથી ઘાંટો પાડ્યો કે બાજુમાં ઉભેલ એક કાકાના ચશ્મા પડી ગયા. કાકા એવા ગુસ્સે થયા કે ઉપાડીને એક ઢેખાળો ટીનાને માર્યો.
એ જોઈને અમારી આખી ટોળી ત્યાંથી ખસીને બીજી જગ્યાએ. અમે ભલે અંદરોઅંદર ઝઘડીયે પણ થર્ડ પાર્ટી સામે તો બધા એક જ..વન ટિમ !!
હવે તો રાવણ ભડ ભડ બળવા લાગ્યો છે. એમાંથી અલગ અલગ જાતના ફટાકડા ફૂટે છે. અને આકાશમાં એક મનગમતો નજારો છવાય છે. લોકો બધા બળતા રાવણને જોઈને હરખાય છે. એને જોઈને મારા મનમાં જે વિચાર આવ્યો તે થોડો લાગણીશીલ છે. ગામે ગામ આમ રાવણ બળતો હોય છે અને લોકો એને જોઈને આનંદની કિકિયારીઓ પાડે છે. અને ઉત્સવ જેવો માહોલ બનાવે છે. તો એને જોઈને સતી મંદોદરીની હાલત કેવી હશે ? એક રાક્ષસની પત્ની સતી અને તે પણ રાવણ જેવાની. જે વિચાર આવ્યો છે તે લખી નાખ્યું.
આ લેખ તો હાસ્ય લેખ છે. તો હવે આપણે લાગણીના વેગમાંથી બહાર આવીએ.
અમારું ધ્યાન તો બળતા રાવણ અને એની અંદરથી ફૂટતા ફટાકડામાં જ છે. ધીરે ધીરે જગમાલ તો ટોળાની છેક આગળ જતો રહ્યો; સાથે અમે પણ. અમે બધા વળી પાછા ફટાકડા અને આતશબાજીના નજારા સાથે મસ્ત બની ગયા. હજી તો અમે બધા રાવણ સામે જ જોઈને મજા લૂંટતા હતા ત્યાં તો અમે જ્યાં ઉભેલા ત્યાં લોકોમાં નાસભાગ થતી જોઈ. હું તો મનમાં હરખાયો. કે ચાલો ત્યાં હોત તો નાશભાગમાં કીચડાઈ જાત. હજી તો પૂરો હરખાઈ પણ ના રહ્યો કે અમે લોકો બધા હેબતાઈ ગયા. બધાં ટોળાને વીંધતો જગમાલ ચડ્ડી ભેર ટોળા વચ્ચે “ કશું નથી થયું કશું નથી થયું  અમને કશું નથી થયું ” એમ બૂમો પાડે છે. અને સરકસમાં રિંગમાં જેમ ઘોડો ગોળ ગોળ ફરે તેમ ફરે છે. ટીનો તો ટોળું વીંધતો દોડીને એની પાસે પહોંચી ગયો
“ એલ જગમાલ આ શું છે ? અને તારો ટ્રેડિશનલ ડ્રેસ ક્યાં ? ”
એને જે વાત કહી તે ફ્લેશબેક
બનેલું એવું કે કોઈ ટીખળ ટપુએ રાવણના પૂતળામાં રોકેટ મૂકી દીધેલું. રોકેટ ઉડીને જગમાલના ધોતી ડ્રેસમાં અને જોતજોતામાં ધોતી ડ્રેસ સળગવા લાગ્યો. એ જોઈને કોઈએ એનો ડ્રેસ ખેંચી લીધો. જો એમને ડ્રેસ કાઢ્યો ના હોત તો જગમાલ દાજી જાત.
હજી તો જગમાલ બધી વાત જ કરે છે ત્યાં તો નરીયાના શરીરમાં ભીમ પ્રવેશ્યો કે શું, જગમાલને બે હાથે ઊંચક્યો. અને જઈને તળાવના પાણીમાં લઇ ગયો. અમે બધા એની પાછળ પાછળ ભાગ્યા અને સાથે અમારા મહેલ્લા વાળા. જગમાલ તો નરીયાની પકડમાં “ મને કશું નથી થયું ” બોલે રાખે. નરીયાએ તો જગમાલને પાણીમાં ઝબોળી દીધો. નરીયાની આ એક્શનને અમે ફૂલ અને મોતીડે વધાવી લીધી.
બે દિવસ પછી પાછો જગમાલ એવોજ બીજો ટ્રેડિશનલ ડ્રેસ પહેરીને મહેલ્લામાં આવ્યો.
અમે બધા એને ઘેરી વળ્યાં કે “ શું થયું જગમાલ ? હવે તો દશેરા પુરા થઇ ગયા ”
હકાએ મને ઈશારો કર્યો કે “ આજે જેમ્સ બોન્ડ જીગા પહેલા હું ખબર લઇ આવ્યો છું; કે જગમાલને થોડા દિવસ ટ્રેડિશનલ ડ્રેસ પહેર્યા સિવાય છુટકો જ નથી ”
(એકલા એકલા પણ હસવાની છૂટ છે)

HAPPY VIJYADASHMI  !! 🙂 🙂

Advertisements

About રીતેશ મોકાસણા

દરેક વ્યક્તિ કોઈને કોઈ શોખ સાથે સંકળાયેલી હોય છે.હું પણ મારો એક શોખ અહી કલમ દ્વારા રજુ કરું છું.આશા રાખું કે મારો બ્લોગ વાંચીને એટલા નિરાશ નહિ થાવ કે ફરીવાર આ બ્લોગની મુલાકાત લેવાનું પણ ટાળો.સૌની આશા એવી હોય કે વધુ અપેક્ષાને પ્રાધાન્ય આપીને પહેલ કરીએ,પણ ક્યાંક તેનું અવમુલ્યન થાય ત્યારે દિલ ને ઠેશ લાગે છે.સર્વે પ્યારા વાચકો ને મારા નમસ્કાર !!
This entry was posted in હાસ્યલેખ/ જોક્સ. Bookmark the permalink.

6 Responses to જગમાલ દાજી ગયો

  1. Vimala Gohil કહે છે:

    ટેમ્પરરી મિત્ર (જગમાલ) સાથે દસેરાની ઉજવણીની મજા માણી.
    એ ટેમ્પરરી હતો એટ્લે નામ એમજ રહેવા દીધું છે? કે ટણક ટોળીના બીજા નામની
    જેમ એનું પણ છે??

    દશેરાની શુભેચ્છઓ.
    સહકુટુંબ મીઠાઈની જ્યાફત ઉડાવશો.

  2. amitmisra કહે છે:

    आपको दशहरे की ढेर सारी शुभकामनाएँ रीतेश भाई 🙂

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s