મામાનું ઘર કેટલે ?

મામાનું ઘર કેટલે ?

અમારો મહોલ્લો કહો કે પોળ ! પણ તેની સરખામણી અમદાવાદની પોળ સાથે ના કરશો વાચકો. એવી પોળમાં રહેવાનો મોકો નથી મળ્યો પણ ઘણી વાર જવાનો મોકો મળેલો છે એટલો ભાગ્યશાળી ખરો ! લગભગ સાતમા ધોરણમાં ભણતો હઈશ ને એકવાર સારંગપુર ચકલાની પોળમાં જવાનું થયેલું. જેની સાથે ગયેલો તેની પાછળ દોરાયે ગયો. સાપના આકારની જેમ આંટીયું લેતી પોળ, ઘડી સાંકડી તો ઘડીમાં એવું લાગે કે હવે આગળ રસ્તો નહિ હોય. એટલે મારાથી ચુપ ના રહેવાયું, મને ખબર કે આ ભાથી મારો દમ કાઢી નાખશે.
“ હવે પાછા વળીએ, પોળતો પૂરી થઇ ગઈ. ”
“ બકા, ગભરાવાનું નઈ, થોડું ચાલીયે કે બે આવ્યા સમજ. ” તે કહીને ઉતાવળા ચાલવા લાગેલા. ને એમની વાત સાચી નીકળી થોડે આગળ જઈને મને એક વરંડામાં લઇ ગયા ને થોડા આગળ ગયા કે ગાંધી રોડ આવી ગયો. મને ખભા પર ધબ્બો મારીને કહે “ કેમ બકા ? ”
અમદાવાદની પોળો પર પી.એચ.ડી. કરવું ઘણું સહેલું છે. તમે ઢાળની પોળમા ઘૂસો અને પછી જો એકાદ સાંકડી પોળમા થી બીજા રસ્તે ફંટાઈ જાવ તો ઘણા આગળ નીકળી જાવ.
“ અલ્યા અહિયાં પણ રાયપુર જેમ ભજીયા લેવા માટે લાઈન ? ” એટલે લાઈન જોઇને અને થોડી ભૂખ થાકીને લાગી હોય એટલે લાઈનમાં ઉભા રહી ગયા. વારો આવતાં સુધીમાં આડા અવળા ફાંફા મારો કે “ અલ્યા આ તો રાયપુર ભજીયા વાળો જ છે. ”
હા, આવું બને કે તમે ક્યાં ના ક્યાંય નીકળી જાવ.
અમારી શેરી એટલે જુનું નામ લીમડાવાળી શેરી. અમદાવાદનું દાણીલીમડા અને અમારી લીમડાવાળી શેરી બેયમાં એક વસ્તુ કોમન લીમડો. અગર તમે દાણીલીમડાથી ચાલીને શાહઆલમ જવાની બસ પકડવા નીકળ્યા હોય તો ખબર હશે કે લીમડાના જંગલમાંથી નીકળો તેવું લાગે, એટલા બધા લીમડા હતા. અમારી શેરીમાં પણ ચાર-પાંચ લીમડા રાજ કરે, આથી શેરીનું નામ લીમડાવાળી શેરી પડ્યું હશે.
અમારી શેરીમાં બકો નવો નવો રહેવા આવેલો. બકો એટલે ‘ જો બકા ’ વાળો બકો નહિ. પણ સાચો બકો. ગુસ્સે ના થાવ, બકા તો સાચાજ હોય પણ એનું નામ બકુલ. એનું નામ કોણે બકો કરી નાખેલું તેનો કોઈ સજ્જડ ઈતિહાસ અમારી ટોળીને મળેલો નહિ. તો એમાં અમે શું કરીએ ? અમે બકોજ કહેવાના ને ? નરેશ ઉર્ફે નરિયો, જેમ સાપ પકડવામાં કાબરો તેમ આ બકો મધ પાડવામાં કાબરો. જે લોકો કદી ગામડાની હવા લેવા પણ નથી ગયા તેને મધપુરાણ વિષે જ્ઞાન નહિ હોય. પણ પણ જો તમે કુમાર ગૌરવની ફિલ્મ ‘ રોમાન્સ ’ જોઈ હોય તો, તેમાં એને મધ પાડતો બતાવ્યો છે. મધ પુરાણ વિષે જાણવા માટે રોમાન્સ ફિલ્મ જોઈ લેતા બધું જ્ઞાન મળી જશે એવી કોઈ ખાતરી નથી મિત્રો. પણ અમારામાંથી નરિયો, ટીનો અને હકા સિવાય લગભગ બધા ફટુ. બાજુની શેરીમાં પણ જો મધ ઉડ્યું હોય તો અમે લોકો અમારી શેરીમાં રિયા રિયા માથે બેય હાથ ઢાંકીને ઘરમાં ભરાઈ જઈએ. નવા નવા આવેલા બકાએ લીમડાની નીચી ડાળ પર મધ જોયું. એને મધ વિષે ઘણું બધું જ્ઞાન ખરું !
“ હકો મને કંપની આપે તો મધ પાડીએ. ” લખોટીઓ ખિસ્સામાં નાખતો બકો આગળ આવ્યો.
“ નરીયાને પકડ ” ખબર નહિ પણ આજે તો હકો પણ ઢીલો પડી ગયો.
“ ના, હમણા મારો ડોહો આવશે તો મારા વાળ પકડી ને કહેશે કે લીમડા પર તારી માં ખાવા દે છે ? ” ને તે છટકી ગયો.
નવરાત્રીનો થાક હજી ઓગળ્યો નહોતો. કે વળી બધા દિવાળીની રાહ જોતા હતા. લીમડાવાળી શેરીનું અમારું મકાન જુનું હતું, નળિયા વાળું. શરદ પૂનમે તો દૂધપૌઆ વગર તો કેમ ચાલે! અગાસીમાં ચડીને દૂધપૌઆ રાખવાનું અને લઇ આવવાનું ટેન્ડર જાણે અમારી ટોળીના ભાગે. ટીનો, દિલો અને જીગો આના મેઈન કોન્ટ્રાકટર. બકો આ વર્ષે નવો જોડાયો, આમેય થોડો હોંશીલો ખરો, ગમે તેમાં પણ ભાગ તો લે જ; પછી ભલે ઢીંચણ ભંગાય !
સરસ મજાનો ચાંદો ખીલ્યો હતો. હાથી કાન હલાવીને પવન નાખે તેવી ગતિથી પવન વહેતો હતો. અમારી ટોળી આ વાતાવરણ નો લાભ લેવા આતુર થઈને બે એક મિત્રો નહોતા આવ્યા, તેની રાહ જોતા હતા. આવી મજાની દૂધ જેવી અજવાળી રાતોમાં અમે લોકો ‘ મામાનું ઘર કેટલે ‘ રમીયે. હું, મારો ભાઈ, ટીનો, દિલો, જગો, બકો, જીગો અને બાજુની શેરી વાળો વજો પણ ખરો. બધા ભેગા મળીને ‘ મામાનું ઘર કેટલે ‘ રમવાનું નક્કી કર્યું.
ગામે ગામે રમવાના નિયમો અને રમતમાં થોડો ઘણો ફેર પણ પડે. અમને લોકોને અમારી આગળની પેઢી એ જે શીખવેલું તે મુજબ અમે રમીએ. આ રમતમાં દાવ દેનારને પાછળ ઉભો રહીને એક છોકરો બેય હાથે આંખો બંધ કરી દે. તે આગળ ચાલે, પાછળ વાળો બોલે “ મામાનું ઘર કેટલે ? ” એટલે પેલો “ દીવો બળે એટલે ” એવું કહે. પછી થોડે આગળ જઈને એની આંખેથી હાથ હટાવીને પેલો ભાગે. અને કોઈ એક પણ પકડાઈ જાય એટલે તેને દાવ આપવાનો. રમીને બતાવવા જેટલું તો મને લખીને બતાવવાનું નહિ ફાવે; દરગુજર ! અગર આ રમત આનાથી અલગ રમાતી હોય તો કહેવા કૃપા કરશો.
દાવ દેવાનો વારો આવ્યો નરીયાનો એટલે ટીનો સૌથી ઉંચો; તેને નરીયાની આંખો પર હાથ રાખીને શેરી વચ્ચો વચ્ચ ઉભો રાખ્યો. અમે બધા દાવ લેવા પોજીશનમાં ગોઠવાઈ ગયા; અને રમત ચાલુ થઇ.
‘ મામાનું ઘર કેટલે ’ બોલીને ટીનાએ નરીયાને ધક્કો મારીને આગળ ચાલતો કર્યો; તો વળી નરિયો પણ જાણે ગઢ જીતવા જતો હોય તેમ ‘ દીવો બળે એટલે ’ બોલીને સાદ પુરાવતો જતો હતો. જતા જતા ટીનાએ સવારીને લીમડાની બાજુમાંથી કાઢી. શેરીબાજુની લીમડાની ડાળ તો ઘણી નીચી હતી એની સાથે નરિયો અથડાયો. નરીયાના નસીબ કહોકે ટીનાના બદનસીબ, લીમડાની ડાળે તાજુ જ મધ બેઠેલું તે ઉડ્યું. ટીનાએ જોયું કે એવો ભાગ્યો કે જઈને પોળના એક મોટા ઓટલે જઈ ચડ્યો. પાછળ જોવા પણ ના રહ્યો કે નરીયાની હાલત કેવી થઇ હશે ! આ બાજુ નરિયો તો પોતાની આંખો ખુલ્લી થઇ કે કોણ જલ્દી પકડાય તેવો છે તે જોવા ચારેબાજુ જોવા લાગ્યો અને “ ઓ માં……ઓ બાપ રે ! ” કરતો ભાગ્યો.
“નરિયા, આવું નહિ ચાલે, દાવ આપીને જા. ” બધાએ બુમ પાડી પણ સાંભળે કોણ ? એ તો સીધો ઘરે જતો રહ્યો. અમારી ટોળીમાંથી કોઈની મજાલ નહોતી કે તેના ઘરે જઈને એમ કહી શકે કે ‘ નરીયા દાવ આપીજા ’ એ તો ગયો પણ ટીનોય ભાગ્યો તે પાછો જ ના આવ્યો. એક વાર રમતમાં ભંગ પડે એટલે રમવાનો મુડ મરી જાય. આમ તેમ ટહેલી ને બધા વિખેરાયા.
બીજા દિવસે વળી શેરીમિત્રો સૌ ભેગા થયા પણ નરિયો દેખાય નહિ, અમે માન્યું કે એના ફાધર ઘરે હશે એટલે નહિ આવ્યો હોય. અમે બધા ઓટલા પર બેસીને ગપ્પા મારતા હતા કે; એકે નરીયાના ફાધરને ઘરની બહાર જતા જોયા, આથી અમારી ટોળી એના ઘરે પહોંચી ગઈ. અમે લોકોએ જોયું કે તે અરીસા સામે ઉભો ઉભો મેક અપ કરતી મુદ્રામાં હતો. અરીસામાંથી અમને જોયા કે અવળું ફરીને જ બોલ્યો “ જાવ બધા, મારા ફાધર હમણા તમાકુ લઈને આવી જશે. ”
“ તને તો ખબર છે કે એક વાર ગેમ ફોક થાય એટલે દાવ જાય. ” દિલાએ કહ્યું.
“ દાવને કોણ રોવે છે ! ” એમ બોલીને તેનાથી અમારી બાજુ જોવાઈ ગયું.
“ અલ્યા નરિયા, આ તું છે………. શું થયું ?? ” બધા એક સાથે બોલી ઉઠયા. તેની આંખો તો દેડકા જેમ ફુલાઈ ગઈ હતી. અને ચહેરો વિકરાળ લાગતો હતો. મધમાખીએ ડંખ મારી મારીને મોઢું ય ફુલાવી દીધું હતું. વળી પાછો બાપાએ માર્યો તે અલગ !
“ આ બકો છે ને, બહુ મધ ખાવું હતું તે. મધમાખીઓએ મોઢું ફુલાવ્યું અને ડોહા એ બારડો. ” કહીને તે રોવા જેવો થઇ ગયો.
“ જો બકા, આવું કરાય ? ” ને અમે બધા તેની પર તૂટી પડયા. કે નરીયાના ફાધરના ખોંખારનો આવાજ આવ્યો કે અમે બધા નાસી ગયા.
Advertisements

About રીતેશ મોકાસણા

દરેક વ્યક્તિ કોઈને કોઈ શોખ સાથે સંકળાયેલી હોય છે.હું પણ મારો એક શોખ અહી કલમ દ્વારા રજુ કરું છું.આશા રાખું કે મારો બ્લોગ વાંચીને એટલા નિરાશ નહિ થાવ કે ફરીવાર આ બ્લોગની મુલાકાત લેવાનું પણ ટાળો.સૌની આશા એવી હોય કે વધુ અપેક્ષાને પ્રાધાન્ય આપીને પહેલ કરીએ,પણ ક્યાંક તેનું અવમુલ્યન થાય ત્યારે દિલ ને ઠેશ લાગે છે.સર્વે પ્યારા વાચકો ને મારા નમસ્કાર !!
This entry was posted in હાસ્યલેખ/ જોક્સ. Bookmark the permalink.

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s