જવા દે ને

જવા દે ને

હકો જેમ જેમ બાળકમાંથી મોટો થતો ગયો, તેમ તેમ વધુ ને વધુ ફેમસ થતો ગયો. હકો એટલે અમારો લોકલાડીલો મિત્ર હસમુખ ! આમારી પોળમાં તે ખુબ પ્રખ્યાત અને થોડો ઘણો લોકપ્રિય પણ ખરો. અગાઉના લેખમાં તેના અમુક કરતૂતો વિષે લખેલું છે. ને વધુ મઝા માણવી હોય તો અગાઉના લેખો વાંચી જાવ.
હવે તો હકો કોઈ સામાન્ય માણસ નથી રહ્યો;પણ સ્કુટરમાં ટીફીન લટકાવીને નોકરી જતો થઇ ગયો છે.ભણવામાં કેટલો બધો પાવરફુલ હતો તે અત્યારે નહિ કહું. પણ લાકડું જાડથી વિખૂટું પડે એટલે સુકાય તો ખરું ! અને જીવે એને કંઈક કમાવું તો ખરુજ ! ધકેલ પંચા દોઢસો ની ગતિએ હકા મહારાજ એક નોકરી કરવા માટેના યોગ્ય ઉમેદવાર થઇ ગયા. એ વાત જુદી હતી કે તેના ગુણો ને લાયકાત એવા નહોતા.પણ કહેવાય છે કે દાણે દાણા પર કોઈક નું નામ લખેલું હોય તેમ નોકરી નોકરીએ કોઈક નામ ફીટ થયેલું હોય છે ! તેવા ધોરણો અનુસાર અને તેના કાકાની લાગવગને લઈને હકો નોકરી એ લાગી ગયો. શરૂઆતમાં એક અઠવાડિયું તેના ફાધરે સાયકલ લઈને નોકરી જવા મોકલ્યો. આમ તો તેનું નોકરી સ્થળ વધુ દુર નહોતું. એક અઠવાડિયું ને વજન દઈને એટલા માટે લખ્યું છે કે .એ એક અઠવાડિયું તેના જીવનમાં એક નવો વળાંક લાવી ગયું.
સાયકલ ચલાવવામાં થોડો દાધો; કોઈ સાયકલ વાળો તેની આગળ થઇ જાય એ તેને પસંદ નહિ…કોણ જાણે કેમ ?? પણ એ અમારી પોળનો જાણે શહેનશાહ !કોઈ સાયકલ લઈને આગળ થયો નથી ને ભાઈ બમણા વેગે સાયકલ ચલાવે અને સૌને પાછળ રાખતો કારખાને પહોંચી જાય.સોરી હકા; ભૂલમાં તારું કારખાના વાળું સિક્રેટ મારાથી કહેવાઈ ગયું. હવે કહી જ દીધું છે તો કહી નાખું વધુ પણ..પછી હકો થોડી જોખી જોખી ને આપશે તે વખતે કાનમાં રૂ નાખી દઈશ.
એમ પાછો હકો ભોળો બહુ. એક વાર અમે લોકો કુવામાં નહાવા પડેલા; દોડતો ક હકો આવ્યો ને અમારી સાથે નહાવા લાગ્યો. થોડી વાર થઇ કે તેના સી.આઈ.ડી. ફાધર દોડતા દોડતા આવ્યા. કોઈએ હકાને ચેતવ્યો “ હકલા, આજ તું મર્યો.. ” ત્યાં તો હકાના ફાધર કુવા સુધી આવી ગયા. પણ હકો એમ ગાંજ્યો જાય તેમ નહોતો; કાચબાની જેમ ગરક દઈને તળિયે જતો રહ્યો. અમને એની એ આગવી ને કોપી રાઈટ લાક્ષણિકતાની ખબર. કુવા અંદર જઈને કોઈક પત્થરનો ભાગ પકડીને ભાઈ છાનો માનો ટેકવાઇ જાય ! રાબેતા મુજબ એવું કર્યું અને આ બાજુ એના નસીબ ફૂટેલા કહો કે હું એટલો કાબરો નહિ; તેના ફાધરે મને ઈશારો કર્યો કે હકો ક્યાં ?? એટલે મેં પણ જાણે ખુબ હોશિયારી બતાવીને કુવાની અંદર બતાવતો ઈશારો કર્યો. એના ફાધર થોડી વાર ઉભા રહ્યા કે; પાણીના બડબડીયા સાથે હકાની સવારી પાણીની સપાટી પર આવી. જેવા બાપને જોયા કે શર્ટ લીધા વગર ભાગ્યો. ઘરે જઈને શું હાલત થઇ હશે તેના કરતા આવીને મારી હાલત ખરાબ કરી. એકદમ ગિન્નાયેલા ચહેરે હકો મારી સામે આવીને બેય આંખો એટલી પહોળી કરીકે આખો કુવો મને એ આંખોમાં દેખાયો. આવીને એટલું બધું ભરાડ્યો કે મને વચ્ચે બોલવાનો કોઈ ચાન્સ ના આપ્યો. એકદમ શાંત થયો એટલે મેં મારા કાનમાંથી રૂ ને કાઢી નાખ્યું. કારણ જેમ એને કોઈ મિત્રે કહી દીધેલું કે મેં તેના ફાધર ને કહી દીધેલું તો એવા કોઈ મિત્રે મને જાણ કરી દીધી કે, હકો વિકરાળ સેના લઈને મારી પર તૂટી પડવાનો છે. એટલે મેં પણ તકેદારી રૂપે રૂનાં પૂમડા કાનમાં નાખી લીધા.
“ મને શું ખબર કે તું ઘરેથી પૂછ્યા વગર નહાવા આવ્યો હઈશ. ” મેં બચાવ પક્ષે એટલું કહ્યું ને છાનો માનો ઉભો રહી ગયો.
“ પૂછીને તો હું કદી નથી આવતો પણ બાપાએ મને લાઈટર લેવા મોકલેલો તે સીધો નહાવા આવી ગયેલો. ”
“ ભોપા જેવા, તારો વાંક ને ગાળો અમારે ખાવાની ?? ”
“ મને માફ કરજે મારાથી થોડું વધારે બોલાઈ ગયું હોય તો. આ તો આ વખતે બાપાએ થોડો વધારે માર્યો ને એટલે ! ”
એક દિવસ હકો સાયકલ લઈને કારખાને જાય અને કોઈ એક ભાઈએ સાયકલ ને ઓવર ટેક કરી. બાત ખલાસ ! હકાએ બમણા વેગે સાયકલ ભગાવી. પણ આ તો ઓલમ્પિકની રેસ જેવું થયું, બેય એકબીજાને ગાંઠે નહિ…આથી હકે પેલાની સાયકલને એક લાત મારી કે બેય ગડથોલું ખાઈને પડી ગયા.પછી તો ખેલ મારામારી પર આવી ગયો.હકા પાસે કશું નહોતું.પહેલીવાર બેલ્ટ નહિ પહેરવાનું નુકશાન દેખાણું.આથી ટીફીન કાઢીને પેલાને એક ગાલ પર માર્યું કે ટીફીન નું ઢાંકણ ખુલી ગયું અને શાકનો રસો તો પેલાના ગાલે ઉતરવા લાગ્યો. ત્યારથી લોકોમાં એ ફેમસ થઇ ગયો કે લોકો તો લોહી કાઢે પણ હકો તો શાકનો રસ કાઢી નાખે ! અને ઉપરથી ફાયદો એ થયો કે સાયકલ લઈને જતો હકો હવે સ્કુટર લઈને જવા લાગ્યો.
હકો પાછો કામમાં ખંતીલો; છેલ્લી દિવાળીમાં બહુ કામ રહેલું તો બત્રીસ કલાક સુધી એક ધારુ કામ કર્યું. મતલબ એક સાથે ચાર શિફ્ટ કરીને ઘરે આવ્યો. ઘરે આવીને પોળમાં કોઈને મળ્યા વગર સુઈ ગયો. તેના ફાધર તોયે તેની ચિંતા ઘણી કરે કે બીજા દિવસે સવારની શિફ્ટમાં જવા માટે એલાર્મ મૂકી દીધો. ત્રણ દિવસ પછી હકો મળ્યો તો એટલું બધું હસ્યો કે બોલી પણ ના શકે. અમે તેને પૂછી એ તો કશું બોલી જ ના શકે. લગભગ અડધો કલાક પછી ભાઈને હસવાનું બંધ થયું.
“ જો હસવાનું બંધ થયું હોય તો કહે હવે. ”
તોયે પહેલા થોડું તો હસી જ પડ્યો ને વળી બોલ્યો.”અરે યાર વાત જ એવી હતી કે બત્રીસ કલાક નોકરી કરીને ઘરે રાત્રે સુતો હતો.કંપની માં કામ ને લીધે આખો દિવસ ફોન ચાલુ હોય.અને સવારે છ વાગ્યે એલાર્મ વાગ્યો તો મને એમ કે ફોન આવ્યો તો મેં એલાર્મ ઉપાડીને હલ્લો હલ્લો કર્યું…….” ને વળી પાછો ખડખડાટ હસવા લાગ્યો. વળી આગળ ચલાવ્યું. “સામેથી કોઈ જવાબ ના આપે એટલે ફોનનું રીસીવર મારાથી ફેંકાઈ જ જાય. તે જોરથી એલાર્મ નો ઘા કર્યો ”
અને વાત સાંભળી ને અમે લોકો એટલું હસ્યા કે આખી પોળને એવું લાગ્યું કે અમે લોકો કોઈ કોમેડી ફિલ્મની સ્ટોરી કહેતા હશું. આમજ અમારો હકો ઘણી વાર કોમેડી ફિલ્મનો હીરો બની જાય !
ઘણી વાર કોઈ ફિલ્મ જોવા જવાની ઈચ્છા થાય એટલે હકો જાતે કપડા ને ઈસ્ત્રી કરી નાખે.એક વાર ઢગલો એક કપડા ભેગા થઇ ગયા ને બેસી ગયો ઈસ્ત્રી કરવા. ચાર પાંચ દિવસ પોળમાં દેખાયો નહિ એટલે અમે લોકોએ માન્યું કે હકો પાછો શિફ્ટમાં ફસાઈ ગયો હશે. એક દિવસ દેખ્યો કે ડાબા ગાલે આડો હાથ રાખીને આવ્યો. એમાં અમારો નરીયો થોડો અળવિતરો કે તેનો હાથ ખસેડી ને જોવા લાગ્યો કે વીર હકો કોઈ દી’ ગાલને સંતાડે નહિ ને આજે આમ કેમ ?
“ અલ્યા હકા….આ ગાલે શું થયું ?? ”
“ દાજેલો છું તે દેખાતું નથી ?? ” સામે છાણકાના ભાવે તે ગર્જ્યો.
“ દેખાય છે એટલા માટે તો પૂછ્યું એમ કહે ને ” મેં વળી સાથ પૂર્યો.
ગમે તે હોય પણ હું બોલું એટલે હકો થોડો ઢીલો પડી જાય અને જવાબ આપવા મજબુર બની જાય.
“ કશું નહિ ઈસ્ત્રી કરવા બેઠેલો ને કાકાનો ફોન આવ્યો, ભૂલમાં ઇસ્ત્રીને ઉપાડીને હેલ્લો કર્યું ને મારો ગાલ દાજી ગયો. ” ખસિયાણો પડતા તે બોલ્યો. આવો ભોળો અમારો હસમુખ.
‘ દેશ રે જોયા દાદા પરદેશ જોયા ’ફિલ્મ એક સાથે ઘણા થીયેટરોમાં લાગેલી…ને અમારી ટોળી એ પણ ફિલ્મ જોવા માટે પ્લાન કર્યો. પહેલું વિક તો પડે એના ભુક્કા જેવી હાલત થઇ. બીજા વીકમાં તો બે કલાકમાં જ એડવાન્સ બુકિંગ પુરુ થઇ જાય. હવે અમારી ટોળી એટલે નક્કી કર્યું પછી પાર પાડવાની વાત !
કોઈ બુદ્ધિ શાળી એ કહ્યું કે અગર કોઈ લાલો ઓળખતો હોય તો ટીકીટો મળી જાય. ને અમારી ટોળી અંદરો અંદર પૂછપરછમાં લાગી ગઈ. કોઈને પણ લાલો ઓળખે નહિ. આજે પહેલી વાર અમારી ટોળકીએ કબુલ્યું કે નાનો માણસ પણ કામમાં આવે. જોકે લાલો કોઈ નાનો માણસ નહિ પણ પડછંદ કાયા ધરાવતો ને ડરામણી આંખો વાળો પહેલવાન.મને તો દુરથી પણ તેની બીક લાગે.ટીકીટની લાઈનમાં જો કોઈ ‘ઘુશ’મારવા ટ્રાય કરે અને લાલો જોઈ જાય એટલે આવી બન્યું. માર પેલાને પડે અને ધ્રુજારી મને આવે. એવામાં હકાની પધરામણી થઇ અને અમારા નિરાશ ચહેરા જોઇને જાણે અમને કોઈ ઊંડા ધરામાંથી બહાર કાઢી શકવાનો હોય તેમ પૂછ્યું. “ કેમ બધા મરેલી ઘો જેવા મોઢા કરીને ઉભા છો ? ”
“ કોઈ લાલો તને ઓળખે છે ? ” નરીયા એ બાઉન્સ બોલ ફેંક્યો.
“ લાલો..હા.. મારો ખાસ દોસ્તાર…”
એટલે અમે તો બધા રાતનો શો નક્કી કરીને પહોંચી ગયા થીયેટર પર. બધાએ પૈસા ભેગા કરીને હકાને આપ્યા. નવ વાગ્યા પણ હકા ને કહીએ એટલે એક જ વાત “ થોડી ધીરજ રાખો..હમણા લાલો આવશે.”
અમે બધા તો બસ ફિલ્મની લગની ને માંડ માંડ રોકતા હતા. ફિલ્મ ચાલુ થાય તે પહેલા જે ટ્રેલર બતાવે તે ચૂકવા નહોતા; આથી અમે બધા હકાને દબાણ કરવા લાગ્યા.બધાની નજર ગેટની સામે જ હતી કે જેવો લાલો બહાર આવે તો હકાને ધક્કો મારીને મોકલીએ.
“ લે હકા મારા પૈસા..એક મારી ટીકીટ પણ લઇ લેજે….” કોઈ અજાણ્યા છોકરાએ આવીને હકાના હાથમાં દશ રૂપિયાની નોટ આપતા કહ્યું. અમે બધા તો હકા સામે જોઈ રહ્યા કે નક્કી હકાને લાલા સાથે સોલીડ ફ્રેન્ડશીપ છે.દશ મિનીટ નીકળી ગઈ એટલે જીગો અકળાયો ” અલ્યા હકા, તારો લાલો સામેથી અહી નહિ આવે જા ત્યાં “
“ નહિ શું કામ આવે આ આવ્યો લાલો..અલ્યા લાલા મોડો શું કામ પડ્યો..? ”
અને જીગાએ હાથમાં પત્થર હતો તે જમીન પર એવો પછાડ્યો કે સીધો પાતાળમાં જતો રહે !
“ તું હવે બસ કર, જવા દે ને ” એમ ચિલ્લાતો હું હકાને મારવા લાગ્યો.
Advertisements

About રીતેશ મોકાસણા

દરેક વ્યક્તિ કોઈને કોઈ શોખ સાથે સંકળાયેલી હોય છે.હું પણ મારો એક શોખ અહી કલમ દ્વારા રજુ કરું છું.આશા રાખું કે મારો બ્લોગ વાંચીને એટલા નિરાશ નહિ થાવ કે ફરીવાર આ બ્લોગની મુલાકાત લેવાનું પણ ટાળો.સૌની આશા એવી હોય કે વધુ અપેક્ષાને પ્રાધાન્ય આપીને પહેલ કરીએ,પણ ક્યાંક તેનું અવમુલ્યન થાય ત્યારે દિલ ને ઠેશ લાગે છે.સર્વે પ્યારા વાચકો ને મારા નમસ્કાર !!
This entry was posted in હાસ્યલેખ/ જોક્સ. Bookmark the permalink.

2 Responses to જવા દે ને

  1. Rajesh -Rajkot કહે છે:

    સરસ હ્યુમર સાથેનો હાસ્ય લેખ માણ્યો.

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s